Mke mwema ni yupi????

Chagua mke kipofu, Kitembea hatazami

Mbonize sio potofu, Aonacho halalami

Kiwa nje huna hofu, Haulizi hasimami

Mke alo na kasoro, Kioa ni mke bora

Chagua mke kiziwi, Alokufa masikio

Vijineno haambiwi, Udaku na matukio

Kwa soga haingiliwi, Lughaye maashirio

Mke alo na kasoro, Kioa ni mke bora

Chagua mke lo’ bubu, Ulimi alofungiwa

Matamshi yake tabu, Hasemi akajibiwa

Majungu ya taarabu, Asije akatungiwa

Mke alo na kasoro, Kioa ni mke bora

Chagua mke kiwete, Siwe kiguu na njia

Hatembei enda tete, Mwendo ni wakuguchia

Misafara asifwate, Adiriki kutulia

Mke alo na kasoro, Kioa ni mke bora

Chagua mke kikono, Ukisema hangurumi

Mkianza mabishano, Asikukunjie ngumi

Si bondia wa pambano, Ukorofi hauvumi

Mke alo na kasoro, Kioa ni mke bora

Chagua mke mshamba, Asojuwa vipodozi

Asipende kujipamba, Midume haitongozi

Siringe na kujigamba, Akazidisha mapozi

Mke alo na kasoro, Kioa ni mke bora

@Comrade Mesaya